Ég hygg að það sé að koma yfir mig nýr blogg-andi og að ég sé reiðubúinn í frekari pælingar og skrif . . . en þó á öðrum vettvangi!

Ég er með síðu á Mogga-blogginu, endilega kíkjið þangað og látið í ykkur heyra eða smellið bara hérna á myndina!

Ef þessi hlýindi halda svona áfram þá fer ég að bjóða upp á spælt egg á malbikinu fyrir utan húsið okkar.

Hvort sem að óhófleg hlýnun jarðar sé staðreynd eður ei, þá kvarta ég ekki undan veðrinu undanfarna daga, hér á landi. Svo vonast maður til þess að veðrið haldist svona áfram þar sem ég hóf formlega sumarfríið mitt í gær.

Það er svolítið merkilegt að velta fyrir sér hvernig líf manns þróast á einu ári. Fyrir rúmu ári síðan þá fórum við í sumarfrí, skruppum til Svíþjóðar að heimsækja systur mína og fjölskyldu í Stokkhólmi, ferðuðumst vítt og breitt um landið, lífið lék við okkur bókstaflega. Núna að ári liðnu þá hefur nýr fjölskyldumeðlimur bæst í hópinn, eftir vægast sagt skjóta ferðkomu í heiminn við aðstæður sem ég óska ekki nokkrum manni að upplifa; ég hef gengið í gegnum þrennskonar breytingar í vinnunni minni á einu ári, breytingar sem voru þó allar til batnaðar og stefnir allt í að frekari jákvæðar breytingar eigi sér stað að loknu sumarfríi.

Á þessum tímamótum veltir maður fyrir sér hvernig aðstæður manns verða næst þegar maður tekur sér sumarfrí?

Rok - Rigning - Það er greinilegt að það er komið sumar!

Ég var að fatta það að í gær, 29. maí, voru 8 ár síðan ég útskrifaðist úr Verzló. 8 ára stúdent, 8 ár síðan fyrsta kærastan mín sagði mér upp!

Það var og, loksins er komin ný ríkisstjórn fram á sjónarsviðið, Þingvallastjórn (Uppstigningarstjórn) Sjálfstæðisflokks og Samfylkingar. Stjórnina skipa:

Sjálfstæðisflokkur
Geir H. Haarde - Forsætisráðherra
Þorgerður Katrín - Menntamálaráðherra
Árni M. Mathiesen - Fjármálaráðherra
Guðlaugur Þór - Heilbrigðisráðherra
Einar K. Guðfinssons - Landbúnaðar- og sjávarútvegsráðherra

og síðast en ekki síst . . .

Björn Bjarnason - Dóms- og kirkjumálaráðherra

Samfylking
Ingibjörg Sólrun - Utanríkismálaráðherra
Össur Skarphéðinsson - Iðnaðarráðherra
Kristján Möller - Samgöngumálaráðherra
Þórunn Sveinbjarnardóttir - Umhverfismálaráðherra
Jóhanna Sveinsdóttir - Félagsmálaráðherra
Björgvin G. Sigurðsson - Viðskiptaráðherra

Jæja, hvað finnst fólki um þetta? Af hverju er ekki varaformaður Samfylkingarinnar t.d. ráðherra? Mun Björn Bjarnason stígur niður sem ráðherra eftir tvö ár fyrir Bjarna Benediktssyni?

Jæja, það varð nú heldur lítið um kosningafærslur hérna hjá mér í aðdragana þessara kosninga, eins og ég hafði verið búinn að lofa, enda hefur verði þónokkuð mikið að gera hjá í mínu lífi að undanförnu. Erna Lilja stækkar og stækkar og er nú svo komið að hún er komin framúr 'stóru-frænku' sinni sem er heilum fjórum mánuðum eldri. Að auki hefur margt breyst í vinnunni hjá mér, yfirmaðurinn minn sagði óvænt upp upp miðjan apríl og lét af störfum um síðustu mánaðarmót. Við þessar breytingar munu einhverjar af þeim skyldum sem hvíldu á hans herðum færast yfir á mig og mun það vonandi skýrast betur á næstu dögum hvernig sú tilhögun er. Eitt er þó víst í þeim málum, fylgist vandlega með Nokia Intellisync á næstu vikum.

Kosningarnar sem fóru fram sl. laugardag eru án efa einhverjar tvísýnustu kosningar um árabil. Ekki man ég eftir því að lokaniðurstaða hafi verið svona frábrugðin fyrstu tölum síðan ég hafði (ó)vit á því að fara að fylgjast með kosningasjónvarpi okkar landsmanna.

Án efa er Sjálfstæðisflokkurinn sigurvegari þessara kosninga. Ekki nóg með það að ríkisstjórn héldi velli, heldur styrkist flokkurinn um þrjú þingsæti og bætti við sig fylgi með verulegum hætti um allt land nema í NV-kjördæmi. Nýbreytnin í þessu endurspeglast líka í því að Sjálfstæðisflokkurinn á fyrsta þingmann í öllum kjördæmum. Geir H. Haarde er með konunglega litaröð, ef maður notar póker-myndlíkingar í þessu samhengi. Okkar ágæti forsætisráðherra er með stjórnarmyndunarumboðið og ljóst að Sjálfstæðisflokkurinn muni leiða næstu ríkisstjórn. Þau formannsskipti sem áttu sér stað á kjörtímabilinu hafa því fullkomnast í einu öllu því að Sjálfstæðisflokkurinn er að bæta talsverðu við sig.

Vinstri-Grænir unnu mest á allra flokka ef litið er til aukningar á fylgi frá fyrri kosningum og fjölgun þingsæta. VG háði öfluga kosningabaráttu og er greinilegt að þessi flokkur hefur fest sig í sessi sem hið sósíalíska vinstri afl sem mætti túlka sem líklegri höfuðandstæðing Sjálfstæðisflokksins heldur en Samfylkingu nokkurn tímann. Þó eru mörg mál sem að VG hafa sterkar skoðanir á sem Sjálfstæðisflokkurinn hefur einnig sterka skoðun á. En vandinn við flokka með sterkar skoðanir endurspeglast hvergi betur en í þeim málum sem þeir eru á öndverðu meiði með.

Frjálslyndi flokkurinn heldur velli, sem er ef til vill óvæntustu fréttirnar í þessum kosningum. Þrátt fyrir mikinn öldusjó í innra starfi flokksins, sem olli því að erfðaprinsessa flokksins og dóttir stofnanda hans sagði skilið við flokkinn og tók með sér drjúgan hlut af grasrót Frjálslynda flokksins að þá kom það ekki að skapi, flokkurinn heldur þingsætunum sínum. Þó má skilja það að sú staðreynd að Magnús Þór Hafsteinsson, varaformaðurinn sem háði mikla baráttu við Margréti Sverrisdóttur um það embætti á landsfundi flokksins, næði ekki kjöri á Alþingi að kjósendur hefðu ef til vill frekar viljað sjá Margréti í hans embætti. Eins tel ég nú ekki vera mikinn missi í Sigurjóni Þórðarsyni sem náði ekki kjöri í NA-kjördæmi, enda hef ég lengi talið að sá maður geri meira gagn með munninn lokaðan heldur en hitt. Þó tel ég nú að þetta verði síðasta kjörtímabil Frjálslynda flokksins, enda eru ekki miklar líkur á því að flokkur sem skartar engum kvenmanni í sínum helstu embættum og þingsætum verði seint talinn til afreka í því hugarfari sem snýr að jöfnum rétti kynjanna í þessu samfélagi.

Þá er það neðri deildin en hana leiðir óhjákvæmilega Framsóknarflokkurinn sem vægast sagt galt afhroð í þessum kosningum. Framsókn, líkt og Sjálfstæðisflokkurinn og Samfylkingin, skipt um forystuna hjá sér á kjörtímabilinu. Virðist sem svo að það ekki hafa bjargað einu né neinu í þeirra málum og í stöðu þeirra í þjóðfélaginu, sem kom svo skýrt fram í borgarstjórnarkosningum í fyrra. Fylgistapið og þingmannamissirinn er áfall fyrir þennan rótgróna flokk sem virðist ekki eiga nema í kringum 10% grunnfylgi á landsvísu. Framsókn hefur gjörsamlega mistekist að höfða til fólks á höfuðborgarsvæðinu og veltir maður sér hreinlega fyrir því hvort að þessi flokkur sé ekki bara best geymdur út á landi? Jafnvel með höfuðstöðvar á Akureyri og væri í raun að einbeita sér fyrst og fremst að landsbyggðarmálum með beinum hætti? Ef þessi hugmynd hljómar fáránlega að þá hugsa ég samt að hún myndi skila flokknum meira fylgi því að allt annað sem þeir hafa gert endurspeglast í tapi þeirra sem átti sér stað á laugardaginn.

Samfylkingin, sjálfskipaður höfuðandstæðingur Sjálfstæðisflokksins, reið ekki frá feitum hesti þetta árið og virðist frekar að um ólseiga meri hafi verði að ræða þegar það kom að fararskjótum fyrir þennan flokk. Fylgistap frá fyrri þingkosningum sem og færri þingsæti geta ekki talist viðunandi árangur fyrir þennan jafnaðarmannaflokk, sem sækir svo sterkt í hina öflugu jafnaðarmannaflokka í hinum Norðurlöndunum sem og í Bretlandi. Sú velgengni sem þar hefur átt sér stað virðist ekki hafa skilað sér til Samfylkingarinnar og væri hægt að skrifa heila doktorsritgerð um ástæður þess. Þó ber náttúrulega hæst formannsskiptin sem áttu sér stað í flokknum á kjörtímabilinu. Ólíkt Sjálfstæðisflokknum að þá virtist sem svo að formannsskiptin í Samfylkingunni hafi verið síðasti andardráttur Kvennalistans til að hafa bein áhrif á starf flokksins enda fannst manni sem svo að kosningafagnaður Samfylkingarinnar á laugardaginn hafi verið nær því að vera árshátíð Kvennalistans með Þórhildi Þorleifsdóttur í broddi fylkingar upp á sviði. Það er aldrei gæfulegt að þvinga í gegn formannsskipti nema um sökkvandi skip sé að ræða og þrátt fyrir að Samfylkingin hafi minnt meira á gamlan dísel-togara sem væri búið að mála upp á nýtt að þá mátti hann eiga það að hann var á floti.

Íslandshreyfingin kom af stað ákveðinni umræðu í þjóðfélaginu, sem virtist deyja með álsverskosningunni í Hafnarfirði í lok mars. Ómar Ragnarsson, sem verður að öllum líkindum stoppaður upp og settur á Þjóðminjasafnið á endanum, var ekki trúverðugur sem stjórnmálaforingi í mínum huga. Samt er ef til vill mestu mistökin í þessari hreyfingu hvernig Margrét Sverrisdóttir hélt á sínum málum. Konan sem hafði allt í hendi sér eftir hetjulega úrsögn úr Frjálslynda flokknum. Jafnvel var rætt að aðrir flokkar hafi borið víurnar í þennan kvenkost enda finnast á byggðu bóli ekki margar konur sem eru jafn glæsilegar og hún, allaveganna í stjórnmálastarfi almennt. Hinsvegar kaus hún að fara í framboð innan þessarar hreyfingar og við það týndist hún hreinlega. Svo dúkkaði hún upp í Silfri Egils á sunnudaginn, grautfúl yfir þessum kosningaúrslitum og ennþá fúlari yfir því að mæta Jóni Magnússyni, sem átti einhvern þátt í því að bola henni í burtu en Jón náði kjöri inn sem þingmaður Frjálslynda flokksins. Sjaldan hefur maður séð salti nuddað eins fast í jafn opið sár og átti sér stað í þessum þætti.

Þá er það upptalið. Þegar þessi orð eru rituð er ekki ljóst hvaða ríkisstjórn mun taka við stjórnartaumunum næstu fjögur árin. Eins og staðan er núna að þá stendur stjórnin og mun hún standa þangað til annað kemur í ljós. Mitt mat er það að á föstudaginn verði orðið ljóst að Sjálfstæðisflokkurinn og Framsóknarflokkurinn munu ekki verða áfram í stjórn og Sjálfstæðisflokkurinn sé búinn að ná samkomulagi við Samfylkinguna um stjórnarsamstarf. Mun þessi stjórn því verða nefnd 'Uppstignarstjórnin'. En hvað veit ég svo sem hvað mun gerast? Ég spáði því einu sinni að Þorsteinn Pálsson myndi snúa aftur í kosningaslag og leiða borgarstjórnarflokk Sjálfstæðismanna til sigurs í borginni 2006. Annað var upp á teningum þá en kannski verður Þorsteinn bara næsti forseti Íslands?

Samkvæmt fréttum vestanhafs er búið að ná samkomulagi milli ABC-sjónvarpsstöðvarinnar, sem er dótturfyrirtæki Disney World, og framleiðanda hinna geysimögnuðu Lost-þátta. Lost mun verða framleitt í þrjú ár í viðbót og verða búnar til þrjár 16-þátta seríur, sem mun þá gera heildarfjölda þáttanna í lok vetrar 2009-2010 að 120 samtals.

Þetta er mikill léttir fyrir framleiðendur þáttanna, dreifingaraðila og aðra sem botna hvorki upp né niður í því sem er að gerast í þessum þáttum.

Fyrir mig þá hef ég aldrei misst trú á þessum þáttum, frekar hef ég hlegið mig máttlausan yfir þeim sem virðast ekki hafa þolinmæðina í að horfa á þessa þætti og gáfust meira að segja upp eftir lokaþátt fyrstu seríunnar, eftir að hafa setið spennt yfir tækinu fram að því.

Lost er dæmi um sjónvarpsseríu sem gerir skilin á milli sjónvarpsþátta og stórklassa bíómyndar óskýr. Lost er besta sjónvarpsefni sem hefur komið fram á sjónarsviðið síðan 24 leit dagsins ljós.

Setning úr íslensku dægurlagi:

"Ég held ég þrauki, þó að hjarta mitt sé í mauki"

Páskar verða seint taldir hafa sama ljóma og hátíðarbrag og sjálf jólahátíðin. Þykir það miður þar sem þessi hátíð er ekki síðri í hugum kristinna manna og skiptir að einhverju leyti talsvert meira máli þegar það kemur að grundvallarkenningum kristinnar trúar.

Púkapáskaegg, bingó-mótmæli og almennt argelsi í stjórnvöld fyrir að „búa til“ svona heilaga daga þar sem ekki má gera neitt virðist samt sem áður einkenna þessa hátíð hér á landi. Það eina sem virðist tengjast kristinni trú er upplestur á Passíusálmum Hallgríms Péturssonar en það virðist vera komin á sú hefð að þeir séu lesnir á föstudeginum langa í hinum ýmsu kirkjum landsins. Er þetta hin ágætasta þróun en í mínum huga virðist samt sem áður eitthvað vanta upp á þetta.

Fyrir mína parta myndi ég vilja sjá samfélagið okkar þróast í svipaða átt eins og vorskólamót KSS er byggt upp. KSS hefur undanfarna áratugi haldið svonefnt skólamót í Vatnaskógi á þessum tíma og mæta galvösk ungmennin upp í Vatnaskóg á miðvikudeginum og fara síðan ekki í bæinn fyrr en á laugardeginum. Á meðan mótið stendur er dagskráin uppbyggð með þeim hætti að hápunktur mótsins er réttilega á föstudeginum langa þar sem er haldin krossganga og gengið frá kapellunni í átt að Gamla skála og stoppað á leiðinni til að lesa píslarsögu Jesú úr Biblíunni. Um kvöldið er síðan vitnisburðarstund þar sem allir sameinast í bæn og fólk opinberar sínar þjáningar sem og þá gleði sem býr í huga þeirra og hjarta. Þetta er sannkölluð tilfinningaþrungin stund og fær mann til að íhuga það sem gerðist í raun og veru á þessum degi. Á laugardeginum er síðan haldið heim og um kvöldið hittist fólkið aftur og bíður fram yfir miðnætti en þá er kominn páskadagur, dagurinn sem Jesús reis upp á og er þá mikil gleðistund en undirstrikar þessi hátíð sigur lífsins yfir dauðanum.

Ef við kæru Íslendingar gætum tekið þetta okkur til fyrirmyndar þá efast ég stórlega um það að margir væru að pirra sig á því að allt sé lokað og ekki megi gera nokkurn skapaðan hlut. Það nefnilega átti sér stað stórmerkilegur hlutur á þessum tíma í mannkynssögunni. Fólk hefur því tvennt um að velja: íhuga það sem gerðist á þessum tíma eða pirra sig og argasta út í það að mega ekki spila bingó á föstudeginum langa. Hvort ætli sé meira uppbyggilegra?

Spurning: Ég er að leita mér að sumarvinnu, hefurðu einhverja hugmynd?

Svar: Mér skilst að það sé nóg af lausum rúmum á Kleppi, kannski geturðu sótt um þar?

Skilgreining: Er þetta fyndinn brandari?

Ég hélt upp á afmælið mitt að kvöldi 27. mars sl. og bauð fjölskyldunni í kaffi. Þetta var yndisleg stund og alltaf gaman að hitta gott fólk á góðri stundu. Hinsvegar þurfti ég að vakna kl. 4:30 um nóttina af því ég þurfti að fara út á flugvöll því að ég var bókaður á ráðstefnu hjá Nokia sem haldin var í Portúgal.

Ferðin gekk ágætlega, við flugum til London og lentum á Heathrow og náðum þar í tengiflug til Lissabon í Portúgal. Eftir þetta langa og stranga flug náðum við að finna farangurinn okkar og svo var tekið á móti okkur og það átti að keyra okkur upp á hótelið þar sem ráðstefnan var. Mér til mikillar undrunar var okkur sagt þegar við vorum á leiðinni að ferðin ætti ekki að taka meira en klukkutíma því að hótelið var 100 km í burtu frá Lissabon. Ráðstefnan var sem sagt haldin á 5 stjörnu Marriott-hóteli sem var við vesturströndina. Þetta er án efa flottasta hótel sem ég hef verið á, rosalega flott landslag og ótrúleg staðsetning en akkúrat ekkert annað við að vera þarna í kring, nema maður hafi átt sumarhús þarna í nágrenninu eða spilaði golf, sem ég geri hvorugt.

Nokia kann hinsvegar að halda ráðstefnunar og það var ekkert skafið utan af því. Nokia greiddi fyrir allan mat og barinn var opinn fyrir alla fullu Finnana allan tímann, ég lét mér nægja að fá mér Fanta eða Sprite með lime-sneið, alveg ótrúlega frískur drykkur. Fyrirlesarnir voru heldur ekki af verri endanum því að þetta var hvert fyrirmennið á fætur öðru sem kom þarna og ræddi við okkur um fyrirtækjalausnir Nokia og það sem er framundan í þessu öllu saman. Svo var gæji þarna frá IDC, sem er greiningarfyrirtæki og hafa þeir sérhæft í þeim upplýsingatæknilausnum sem eru á markaðnum í dag.

Eftir hádegið á fimmtudeginum var boðið upp á skoðunarferð niður til Lissabon þar sem við fengum aðeins að sjá og skoða okkur um í borginni sem er hreint út sagt yndisleg. Portúgalar eru nefnilega ólíkir okkur Íslendingum með það að þegar það koma t.d. innflytjendur til landsins að þá drekka innfæddir í sig þá menningu sem sem fylgir þessu nýja fólki og aðlaga sig alveg að þeim, rétt eins og innflytjendurnir aðlaga sig að nýju landi.

Á föstudeginum lauk síðan ráðstefnunni á hádegi og þá þurftum við að skrá okkur útaf herbergjunum af því það átti að flytja okkur í íbúð sem var þarna rétt hjá. Margir flugu heim þarna um eftirmiðdaginn en eina flugið tilbaka til Íslands var ekki fyrr en á sunnudeginum. Þannig að við vorum þarna einhversstaðar út í sveit næstu tvo sólarhringana. Það skaut nú uppi í manni nett heimþrá þarna á föstudeginum og mig eiginlega langaði bara að drífa mig heim. En ég fór þá að spjalla þarna við strák í móttökunni og hann sagði mér að það væri bær þarna rétt hjá, einungis 20 mín. með leigubíl og þar væri hægt að versla og skoða sig um og gera sér glaðan dag. Ég sló til og sá ekki eftir því, ég komst í nokkrar voða góðar búðir þarna og keypti m.a. sólhatt á Ernu Lilju, portúgalskt postulín handa Öglu Mörtu og tvö bindi handa mér. Svo keypti ég mér einhverjar nýlendurvörur til að hafa í íbúðinni sem ég átti að vera og ég get sagt ykkur það að ef við erum að bera saman matvöruverð við hin norðurlöndin að þá ættum við að taka Portúgal með í reikninginn því það var allt svo hundódýrt þarna að ég fór næstum því að gráta.

Þegar ég kom tilbaka var íbúðin tilbúin sem ég átti að vera í og þetta var nú ekkert smá, einhver 100 fermetra íbúð á tveimur hæðum sem ég var bara einn í! Góð nýting eða þannig.

Á laugardeginum kíkti við aftur í bæinn en stoppuðum þar stutt við og þegar við komum tilbaka ákvað ég að leggja mig því að ég var kominn með einhverja pest í mig sem ég er ennþá að vinna úr mér. Ég svaf nánast fram að kvöldmat en þá fórum við á mjög fínan a la carte veitingastað á hótelinu. Okkur grunaði að verðið yrði eitthvað svimandi en ég held að ég hafi sloppið ódýrara útúr þessu heldur en að panta tvennutilboð hjá Dominos!

Á sunnudeginum fór ég á fætur kl. 5 að morgni, bíllinn kom að ná í okkur kl. 5:40 og keyrði okkur út á flugvöll og þá tók við langt ferðalag sem endaði ekki fyrr en 15:30 hér á landi þegar vélin lenti og var ég kominn heim um kl. 17:00, hálftíma áður en gestirnir komu í þrítugs-afmælið hjá konunni minni.

Þetta var rosalega gaman og mikil upplifun og einstakt tækifæri að tala við færustu sérfræðinga hjá Nokia í þessum málum en að sama skapi var svo gott að komast heim eftir svona langt ferðalag!

Jæja, í dag er 26. mars sem þýðir það að á morgun, 27. mars, á ég afmæli.

Ég ætla að gerast svo djarfur og benda fólki á það að ef það hefur áhuga á að óska mér til hamingju með daginn að þá má senda afmæliskort frá eftirfarandi stöðum:

http://www.123greetings.com/

Hallmark - dragdrottning heillaóskakorta í US and A

 

Ég sprakk úr hlátri þegar ég sá þessa setningu í dag:

 "Stop it, Jesus is watching your worthless ass"

Ég held ég skelli þessu á T-bol og reyni að græða pening

Það er ekki laust við það að smá kosningafiðringur sé kominn í mann, enda stefnir í tvísýnustu kosningar hér á landi um langa hríð.

Ég mun reyna eftir fremsta megni að halda úti smá kosningabloggi í aðdraganda þessara kosninga hér á þessari síðu enda veit ég að ég á marga fylgismenn hér úti sem og andstæðinga sem eru á öndverðu meiði við mig í stjórnmálaskoðunum.

Ég vek athygli á skoðunarkönnun sem ég hef sett af stað hérna hægra megin á síðunni og það væri gaman að sem flestir myndu taka þátt, ég mun því reyna að breyta henni og setja inn nýjar skoðanakannanir eftir því sem að á líður.

Því er vonandi von á snörpum umræðum um landsins gagn og ónauðsynjar.

X-D